Taya sa Sugal ng Pag-ibig

Ang pagmamahal ay isang sugal. 

Kung mas malaki ang taya, malaki ang panalo at malaki rin 'pag natalo. 'Pag wala kang tinira, lagot ka. Uuwi kang luhaan at hindi mo alam kung saan ka pupulutin kinabukasan.

Sa pag-ibig, walang nakakaalam kung ikaw ay llamado o dehado. Kumbaga sa karera, mas mataas ang bigayan kung makikibakas ka sa kabayong mas lamang ang pagkatalo. Kung ito ang gusto mo, nakakabilib ka. Napanlabanan mo ang mga bulong-bulungan ng mga eksperto at sinunod mo ang paniniwalang walang basehan. Gusto mo lang. Kumakapit ka sa pag-asang may napakaliit na posibilid na mabigyang katuparan. 'Pag tumama ka, kikilalanin ka dahil sa lakas ng iyong loob at kung hindi naman, wala kang sisisihin kundi ang sarili.

Ang matagpuan ang 'yong tunay na mamahalin ay gaya ng pagtaya sa ending. Marami kang pagpipilian pero doon ka sa 'yong mapupusuan. Aasa ka sa bawat talbog at ikot ng bolang pagpapasa-pasahan ng iba't-ibang koponan. Maswerte ka kung sa wakas ng laro ay ang mga numero mong alaga ang kalalabasan. Mapapasaiyo ang premyo at kung mamalasin naman, 'wag mag-alala dahil marami pang susunod na laban.

Tulad ng tong-its, ang pag-ibig ay isang malaking pagbabakasakali. May ibibigay sa iyo at gaya ng sa baraha, may makukuha kang bubuo sa'yo habang ang iba ay darating ngunit hindi mo kailangan at itatapon mo. 'Pag kinuha ng iba upang sila naman ang makinabang, iiral ang iyong panghihinayang at pagka-inggit ngunit mabubuhay ang pag-asang may darating pang higit na para sa'yo.

Maihahambing sa sabong ang pagmamahal. May kanya-kanyang manok na aalagaan at patatapangin upang maging handa sa pinakahihintay na laban. Ito ay maihahalintulad sa mga pagsubok sa pag-iibigan. Ang unang sumuko, talo. Kung ang manok mo ang unang bumitiw sa tunggalian, maaari siyang mawala sa'yo ngunit kung kapalaran niya ang maging matatag sa gaano mang kahirap na laban, panalo. Matagal ang inyong pagsasamahan at maaring umabot ng habambuhay.

Ang Cara y Cruz ay walang ipinagkaiba sa mga binuong pagsusuyuan. Ang Cara ay mukha ng pag-ibig na kumakatawan sa mga masasayang mga sandaling pagsasaluhan habang ang Cruz ay ang mga pait na normal na bahagi ng samahan. Sa paghagis ng barya ay ang pag-ikot ng gulong ng buhay pag-ibig. Habang nasa ere ay ang pigil-hiningang paghiling na sa bawat dulo'y makamit sana ang Cara na inaasam. Kung maging Cruz man, sa muling pagtira ay muling katok sa pagkakataon upang ibigay ang ginhawang sana'y nakalaan.

Marami ang may paniniwalang hindi kailanman magdudulot ng kabutihan ang pagkahilig sa sugal. Lantaran mang ipagbawal, walang tigil pa rin ang pagkahumaling ng ilan. Gagawin kahit patago masunod lamang ang hilig.

Sugarol din ang puso kong matagal ng malamlam. Kakitaan man ng sugat ng nakaraan at ituring mang katangahan ang muling pagmamahal dahil sa dalas ng kasawian, patuloy pa rin sa pakikipagsapalaran. Hindi mapapagod... Hindi kahit kailan susuko... Hindi mapipigilan...

Titibok kung kinakailangan kahit walang kasiguraduhan sa kahahantungan. 

Patuloy lang ang sugal sa larangan ng pag-ibig. Kahit pa maging paulit-ulit na talunan, itataya pa rin ang lahat sa ngalan ng tamis na inaasahang panalo.

Taya ka na rin.