Chicken Soup Kontra Sabaw

Kumain ang nagugutom... Magpahinga ang napapagod... Matulog ang inaantok...

Eh kung sinasabaw? Kailangan bang magpahigop???

(Sabaw - nga-nga; walang maisip; walang masulat; _______________; blank)

Ang post na ito ay para sa mga bloggers na nasa gitna ng sabaw moments. Please feel free to add motivational thoughts and living testimonials kung paano nalampasan at napaglabanan ang stage na ito.

Ang mga susmusunod ay ilan sa mga kasagutan sa Sabaw Moments:

1. The Rest

Hindi requirement ang specific number of posts sa isang linggo o buwan. Kung walang maisip na next entry, 'wag ma-depress at 'wag pilitin ang sarili. Pwede ring magpahinga. Kung walang matinong maisulat, manahimik. Be in hiatus. Mag-reflect at 'pag handa na, 'yan ang perfect time to continuously share your thoughts. Sana talaga worth it at may sustansya ang susunod na lathalain matapos ang matagal na pananahimik dahil kung hindi, mas ideal ang tuluyang pananahimik. 

2. The Recharge

Ang kabayo sa kalesa, kahit ilang palo ng kutsero, kung pagod at gutom, hindi mapipilit na tahakin ang pupuntahan. 'Wag magsulat kung walang laman ang isip, puso at pati sikmura. Patok ang posts na ginagamitan ng puso at isip dahil nakakabusog sa diwa ng mga mambabasa kaya kailangang magpahinga at bago tunguin ang muling pagsusulat, recharge through reading or watching something current and relevant. 'Yung may KWENTA at hindi puro KWELA (please lang).

3. The Admission

Tanggapin ang katotohanang ang pagka-blanco ay likas na pinagdadaanan. 'Wag lang gawing libangan nang hindi mauwi sa walang lunas na katangahan. Mainam ang pagiging sabaw na may consciousness kaysa sabaw pero in denial. Kaya palasak ang mga walang kapararakang babasahin ay dahil sa huli. The moment na malaman mong ikaw ay nasa estado ng kawalan, agad aminin sa sarili upang malaman ang mga dapat gawin moving forward.

3. The Signs

Alamin ang mga signos ng kawalan. Ang ilan sa mga ito ay ang pagdami ng mga entries sa iyong 'drafts'. It only means na hirap kang makatapos ng akda o hindi kaya'y ayaw pumirma ng iyong butihing utak sa pagbibigay ng makabuluhang wakas sa iyong mga prospective posts. Isa pa, ang madalas na kawalan ng ideas kung ano ang bagong temang nais palawigin at isalaysay ay isa sa mga signs. Marami pa. Be conscious sa mga ito upang maiwasan ang mga sabaw posts.

4. The Shift

Muling pasadahan ang mga published posts at ang nature ng mga ito. Sa next post, subukang tahakin ang ilang temang malapit sa puso at abot-kaya ng utak. Kung hindi talaga kaya, subukin ang iyong sarili to explore other possibilities beyond comfort zone at malay mo, maka-jackpot ka at 'yan ang maging kasagutan upang mapawi ang writer's block kuno. 

5. The Hop

Iwaksi muna ang pagiging blogger at maging isang bonafide blog hopper. Maliban sa instant connection sa mga kapwa bloggers, tiyak na may mapupulot na aral sa akda ng iba. Isabuhay ang 'It's not all about you..." principle at palawakin ang iyong network sa pamamagitan ng pagbisita at pagbabasa ng blogs ng iba. Isabuhay at isapuso ang mga butil ng kaalaman mula sa iba. Kung wala kang makitang sustansya sa posts nila, be thankful, you're not alone. Learn from them by not being like them!

6. The Repost

Kaysa magbahagi ng mga walang laman at walang kakwenta-kwentang mga posts, muling bisitahin at balikan ang mga best selling posts at i-repost upang maibahagi sa mga new followers/readers ang mga proven and tested havey na banat. Nakatipid na ng energy, staying alive pa rin ang iyong status sa blogosphere at naiwasan mo pa ang pag-share ng mga waley na hirit na bunga ng iyong pananabaw (sabaw term!?!).

7. The Contest

Wagi at makatawag pansin ang ilang mga malikhaing bloggers na may mga pakulo o pakontes. Aside from it is one way of giving back to the readers, effective na paraan din ito  kung walang maisip na bagong topic na nais at kayang talakayin bilang next post. To maintain traffic, launch an online contest for everyone. Ikaw na bahala sa mechanics and for sure, madali lang mag-isip ng concept ng isang game. It's easier than coming up with a sensible post.

8. The End

Kung umay na umay o sawang-sawa na sa kalakaran sa blogging world at wala ng kakaiba o masustansyang kaisipan ang kayang maibahagi, mas naising mamaalam kaysa maging timawa at laughing stock ng iba dahil sa bonggang-bonggang kasabawan. Walang pumilit sa'yo na pasukin ang mundong ito kaya't wala ring mamimilit na manatili ka rito. Kung hindi ka na masaya at pilit na pilit ang iyong kamay, katawan at utak, you better try doing something else. Something more productive. 

Malungkot naman kung sa goodbye mauuwi ang pagiging sabaw. 

Sana 'wag naman. 

Sana 'wag magpapatalo dahil ang kasabawan  ay ___________.

Please fill in the blank. Best answer will get a prize. 

Movie tickets for 2. Seriously.

Game?